अमेरिकाको कमजोर रोजगारी प्रतिवेदनले तत्काल ब्याजदर बढ्ने सम्भावना घटाएपछि सोमबार एसियाली सेयर बजारमा सकारात्मक प्रभाव देखिएको छ। वाल स्ट्रिटको सुधारले लगानीकर्ताको मनोबल बढाए पनि मध्यपूर्वको तनावका कारण कच्चा तेलको मूल्य भने उकालो लागेको छ।

इरान र ओमानबीच स्ट्रेट अफ होर्मुजमा नयाँ समुद्री मार्ग खोल्ने विषयमा सहमति नजिक पुगे पनि ढुवानी पूर्ण रूपमा सहज हुन सकेको छैन। आपूर्ति चिन्ताका कारण ब्रेन्ट क्रुडको मूल्य ०.९ प्रतिशत बढेर प्रतिब्यारेल ८४.३२ डलर पुगेको छ भने अमेरिकी क्रुड पनि ०.७ प्रतिशतले बढेको छ।

तेलको मूल्य वृद्धिसँगै बुधबार सार्वजनिक हुने अमेरिकी मुद्रास्फीति तथ्यांकतर्फ बजारको ध्यान केन्द्रित भएको छ। मुद्रास्फीति अपेक्षाभन्दा बढी देखिएमा फेडरल रिजर्भले आगामी बैठकमा ब्याजदर बढाउन सक्ने अनुमान पुनः बलियो हुन सक्छ।

तर हाल फ्युचर्स बजारले सेप्टेम्बरमा ब्याजदर वृद्धि हुने सम्भावना घटाएको छ। यसले अमेरिकी ट्रेजरी बजार र सेयर बजारलाई समर्थन दिएको छ।

एसियाली बजारमा जापानको निक्केई सूचक ०.६ प्रतिशत र दक्षिण कोरियाको बजार ०.५ प्रतिशतले बढेका छन्। जापानबाहेकको एसिया–प्रशान्त क्षेत्रको एमएससीआई सूचक पनि ०.३ प्रतिशतले उकालो लागेको छ।