मितेरी डेभलपमेन्ट बैंक लिमिटेडका एक संस्थापक शेयरधनीले आफ्नो हातमा रहेको ठूलो परिमाणको शेयर बिक्री गर्ने निर्णय गरेका छन् । धरान, सुनसरीमा केन्द्रीय कार्यालय रहेको यस ‘ख’ वर्गीय बैंकका संस्थापक सुनिल श्रेष्ठले ६८ हजार ८ सय ५० कित्ता संस्थापक शेयर बेच्न चाहेको जानकारी बैंक प्रशासनलाई दिएका छन् ।

श्रेष्ठको निवेदन सञ्चालक समितिको बैठकमा पुगेपछि बैठकले नियमानुसार बिक्री प्रक्रिया अघि बढाउने हरियो झण्डा देखाएको छ । नेपाल राष्ट्र बैंकको प्रचलित नियमले संस्थापक शेयर बिक्री हुँदा पहिलो हक विद्यमान संस्थापक शेयरधनीहरूलाई नै दिनुपर्ने व्यवस्था गरेको छ, त्यसैले बैंकले यो सूचना सार्वजनिक गरेको हो ।

शेयर खरिदमा इच्छुक संस्थापक शेयरधनीहरूले सूचना प्रकाशित भएको मितिले ३५ दिनभित्र आवश्यक कागजात र चाहिएको कित्ता संख्या खुलाई आवेदन दिनुपर्नेछ । आवेदन बैंकको केन्द्रीय कार्यालय महेन्द्रपथ, धरान–१२, सुनसरी वा शेयर रजिस्ट्रार प्रभु क्यापिटल लिमिटेड, कमलादी, काठमाडौंमा बुझाउन सकिनेछ ।

तोकिएको समयसीमाभित्र विद्यमान संस्थापक शेयरधनीहरूबाट खरिदको आवेदन नआएमा भने संस्थापकबाहिरका व्यक्तिलाई पनि शेयर बिक्री गर्ने बाटो खुल्ने बैंकले सूचनामा उल्लेख गरेको छ ।