विश्व वातावरण दिवस २०२६ देशभर मनाइँदै
'समृद्ध भविष्यको आधारः जलवायु एवं प्रकृतिमैत्री विकास' मूल नारासहित सप्ताहव्यापी कार्यक्रम
वि.सं.२०८३ जेठ २२ शुक्रवार ०८:३५
3.11K
shares
shares
काठमाडौं — जुन ५ मा प्रत्येक वर्ष मनाइने विश्व वातावरण दिवस आज देशभर विभिन्न कार्यक्रमका साथ मनाइँदै छ। यस वर्षको मूल नारा ‘समृद्ध भविष्यको आधारः जलवायु एवं प्रकृतिमैत्री विकास’ रहेको छ।
वातावरण विभागले ललितपुरमा मुख्य समारोह आयोजना गरेको छ, जसमा कृषि, वन तथा वातावरणमन्त्री गीता चौधरी प्रमुख अतिथि रहने छिन्। विभागका महानिर्देशक ज्ञानराज सुवेदीका अनुसार, दिवसले जलवायु परिवर्तनका असर न्यूनीकरण र प्रकृतिमैत्री विकासबारे जनचेतना फैलाउने लक्ष्य राखेको छ।
दिवसका अवसरमा देशभर वृक्षरोपण, सरसफाइ तथा जनचेतनामूलक अभियान सञ्चालन हुनेछन्। संयुक्त राष्ट्रसंघको आह्वानमा सन् १९७३ देखि मनाउन थालिएको यो दिवस वातावरणीय चुनौतीबारे विश्वव्यापी जागरण फैलाउने प्रमुख अन्तर्राष्ट्रिय अभियानका रूपमा स्थापित छ।
