सान फ्रान्सिस्को — सहआयोजक अमेरिकाले १० खेलाडीमा सीमित भएर पनि बोस्निया एन्ड हर्जगोभिनालाई २–० ले पराजित गर्दै फिफा विश्वकप २०२६ को अन्तिम १६ मा स्थान सुरक्षित गरेको छ ।

बिहीबार बिहान सान फ्रान्सिस्को बे एरिया स्टेडियममा भएको अन्तिम ३२ को खेलमा फोलारिन बालोगुन र मलिक टिलम्यानले एक–एक गोल गर्दै अमेरिकालाई जित दिलाएका हुन् ।

पहिलो हाफको इन्जुरी समयमा बालोगुनले गोल गर्दै अमेरिकालाई अग्रता दिलाएका थिए । तर दोस्रो हाफमा ६४औं मिनेटमा रातो कार्ड पाएपछि अमेरिका १० खेलाडीमा सीमित बनेको थियो ।

संख्यात्मक रूपमा कमजोर भए पनि घरेलु टोलीले खेलमा नियन्त्रण कायम राख्यो । ८२औं मिनेटमा मलिक टिलम्यानले डिबक्स बाहिरबाट गरेको सशक्त फ्रिकिक सिधै गोलमा परिणत गर्दै अग्रता दोब्बर बनाए ।

त्यसपछि बोस्नियाले खेलमा फर्किने प्रयास गरे पनि अमेरिकी रक्षापङ्क्ति र गोलरक्षकको उत्कृष्ट प्रदर्शनका कारण गोल गर्न सकेन । अन्ततः अमेरिका २–० को जित निकाल्दै क्वार्टरफाइनल प्रवेशका लागि बेल्जियमसँगको भेट पक्का गरेको छ ।

यस जितसँगै फिफा विश्वकप २०२६ का तीनै सहआयोजक राष्ट्र अमेरिका, मेक्सिको र क्यानडा अन्तिम १६ मा प्रवेश गरेका छन् ।