काठमाडौं — विश्वकप फुटबलको इतिहासमा पहिलोपटक फिफा विश्व वरीयताका शीर्ष चार टोली नै एउटै संस्करणको सेमिफाइनलमा पुगेका छन्। पछिल्लो वरीयताअनुसार शीर्ष स्थानमा रहेको फ्रान्स, दोस्रो स्थानको अर्जेन्टिना, तेस्रो स्थानको स्पेन र चौथो स्थानको इङ्ग्ल्यान्डले अन्तिम चारमा स्थान बनाएका हुन्।

४८ टोली सहभागी यस विश्वकपमा फिफाले शीर्ष वरीयताका टोलीलाई फरक–फरक समूहमा राख्ने गरी ड्र संरचना तयार गरेको थियो। त्यसका कारण यी टोलीहरू सेमिफाइनलअघि नै एकअर्कासँग भिड्ने सम्भावना टरेको थियो।

अब उपाधिका लागि पहिलो सेमिफाइनलमा फ्रान्स र स्पेन तथा दोस्रो सेमिफाइनलमा इङ्ग्ल्यान्ड र अर्जेन्टिना आमनेसामने हुनेछन्। यी चारै टोली यसअघि विश्वकप जितिसकेका राष्ट्र हुन्।

विश्व वरीयतामा माथि रहेका टोलीले सधैं अपेक्षित प्रदर्शन गर्ने गरेका छैनन्। यसअघि जर्मनी, स्पेन, इटाली र बेल्जियमजस्ता शीर्ष टोलीहरू विभिन्न संस्करणमा प्रारम्भिक चरणमै बाहिरिएका उदाहरण छन्। तर यसपटक भने फिफाको नयाँ ड्र प्रणालीसँगै शीर्ष टोलीहरूको प्रतिस्पर्धा अन्तिम चरणसम्म पुगेको छ।

विश्लेषकहरूका अनुसार ४८ टोलीको नयाँ ढाँचामा बलिया टोलीहरू चाँडै बाहिरिने सम्भावना घटाउन फिफाले यस्तो व्यवस्था गरेको हो। यसले विश्वकपको अन्तिम चरणमा ठूला टोलीबीचको प्रतिस्पर्धा सुनिश्चित गरेको छ।