काठमाडौं — प्राइम कमर्सियल बैंकले आर्थिक वर्ष २०८२/८३ मा ४ अर्ब ११ करोड २५ लाख रुपैयाँ खुद नाफा आर्जन गरेको छ। यो अघिल्लो आर्थिक वर्षको तुलनामा २८.४८ प्रतिशतले बढी हो। गत वर्ष बैंकले ३ अर्ब २० करोड ७ लाख रुपैयाँ नाफा कमाएको थियो।

बैंकको नाफा वृद्धिमा खुद ब्याज आम्दानी, कर्जा विस्तार र अन्य आम्दानीको योगदान देखिएको छ। समीक्षा अवधिमा बैंकको खुद ब्याज आम्दानी ९ अर्ब २१ करोड २६ लाख रुपैयाँ पुगेको छ। त्यस्तै, कुल सञ्चालन आम्दानी ११ अर्ब ९० करोड रुपैयाँभन्दा बढी पुगेको बैंकले जनाएको छ।

बैंकले निक्षेप र कर्जा दुवै विस्तार गरेको छ। गत वर्ष निक्षेप ५.४६ प्रतिशतले बढेर २ खर्ब ७७ अर्ब ७४ करोड रुपैयाँ पुगेको छ भने कर्जा लगानी ८.२९ प्रतिशतले वृद्धि भएर २ खर्ब २६ अर्ब ४४ करोड रुपैयाँ पुगेको छ।

कर्जा विस्तारसँगै बैंकको खराब कर्जा भने बढेको छ। निष्क्रिय कर्जा अनुपात ५.८१ प्रतिशतबाट बढेर ६.६९ प्रतिशत पुगेको छ। यसले आगामी दिनमा कर्जा असुली र सम्पत्तिको गुणस्तर सुधार बैंकका लागि प्रमुख चुनौती बन्ने देखिएको छ।

बैंकको वितरणयोग्य नाफा १ अर्ब ९० करोड ७४ लाख रुपैयाँ रहेको छ। यस आधारमा बैंकको लाभांश क्षमता ९.१० प्रतिशत देखिएको छ। प्रतिशेयर आम्दानी (ईपीएस) समेत बढेर १९ रुपैयाँ ६३ पैसा पुगेको छ।

कर्जा विस्तारका कारण पुँजी पर्याप्ततामा भने केही दबाब देखिएको छ। बैंकको टायर–वान पुँजी पर्याप्तता अनुपात सामान्य घटेर ९.८८ प्रतिशत कायम भएको छ।

बैंकले खराब कर्जा नियन्त्रण, डिजिटल बैंकिङ विस्तार र जोखिम व्यवस्थापनलाई प्राथमिकतामा राखेको जनाएको छ। एआई, डेटा एनालिटिक्स र रोबोटिक्सको प्रयोगमार्फत सेवा सुधार गर्ने रणनीति पनि अघि सारेको छ।

समग्रमा बैंकको नाफा र व्यवसाय विस्तार सकारात्मक देखिए पनि बढ्दो खराब कर्जाले आगामी दिनमा नाफाको निरन्तरता र कर्जा गुणस्तर व्यवस्थापनलाई मुख्य विषय बनाउने देखिन्छ।