काठमाडौं। मेन्छियाम हाइड्रोपावर लिमिटेडले विशेष साधारण सभा आह्वान गरेको छ। कम्पनीको सञ्चालक समितिको वैशाख ४ गते बसेको बैठकले आगामी वैशाख २० गते सभा बोलाउने निर्णय गरेको हो। कम्पनीले सार्वजनिक सूचनामार्फत शेयरधनीहरूलाई सो दिन उपस्थित भई आवश्यक प्रस्तावमाथि छलफल तथा निर्णय प्रक्रियामा सहभागी हुन अनुरोध गरेको छ।

कम्पनीका अनुसार विशेष साधारण सभा काठमाडौँ महानगरपालिका–३, महाराजगञ्जस्थित रजिष्टर्ड कार्यालयमै बिहान ९:३० बजे सुरु हुनेछ। उक्त सभामा कम्पनीको पूँजी संरचना र आगामी वित्तीय योजना सम्बन्धी महत्वपूर्ण प्रस्तावहरू प्रस्तुत गरिने जनाइएको छ।

सभाको मुख्य एजेन्डाका रूपमा हाल कायम चुक्ता पूँजीको १:१ अनुपातमा हकप्रद शेयर निष्काशन गर्ने प्रस्ताव राखिएको छ। यसबाट उठ्ने रकमको उपयोग कसरी गर्ने भन्ने विषयमा सञ्चालक समितिले गरेको निर्णयलाई पनि अनुमोदनका लागि प्रस्तुत गरिनेछ। नियामक निकायबाट आवश्यक निर्देशन वा परिमार्जनको माग भएमा त्यसअनुसार आवश्यक परिवर्तन गर्ने अधिकार सञ्चालक समितिलाई दिने प्रस्ताव समेत समावेश गरिएको छ।

सभा प्रयोजनका लागि कम्पनीले वैशाख १४ गते एक दिनका लागि शेयरधनी दर्ता किताब बन्द गर्ने जनाएको छ। त्यसअघि अर्थात वैशाख १३ गतेसम्म नेप्सेमा कारोबार भई आफ्नो नाममा शेयर दर्ता भएका लगानीकर्ताहरू मात्र सभामा भाग लिन र मतदान गर्न योग्य हुनेछन्।

कम्पनीले शेयरधनीहरूलाई परिचय खुल्ने कागजातसहित समयमै उपस्थित हुन आग्रह गरेको छ। प्रतिनिधिमार्फत सहभागी हुन चाहनेले तोकिएको समयभित्र प्रोक्सी सम्बन्धी कागजात बुझाउनुपर्ने व्यवस्था गरिएको छ। साथै, सभासम्बन्धी थप जानकारीका लागि कम्पनीको महाराजगञ्जस्थित कार्यालयमा सम्पर्क राख्न अनुरोध गरिएको छ।