काठमाडौं — प्रभु महालक्ष्मी लाइफ इन्स्योरेन्स लिमिटेडका एक संस्थापक लगानीकर्ताले आफ्नो स्वामित्वमा रहेको १३ हजार कित्ता सेयर बिक्री गर्ने भएका छन्। कम्पनीका संस्थापक सेयरधनी नवराज अधिकारीले आफ्नो नाममा रहेको उक्त सेयर बेच्न व्यवस्थापनसमक्ष निवेदन दिएसँगै बिक्री प्रक्रिया अघि बढेको हो।

संस्थापक सेयरको खरिद–बिक्रीमा बहालवाला (विद्यमान) संस्थापकहरूलाई नै पहिलो प्राथमिकता दिनुपर्ने कानुनी प्रावधान छ। सोही व्यवस्थाअनुरूप कम्पनीले मंगलबार (असोज २१ गते) ३५ दिने सार्वजनिक सूचना निकालेर आफ्ना संस्थापकहरूलाई नै खरिदका लागि आह्वान गरेको छ। यसका लागि खरिदकर्ताले नेपाल बीमा प्राधिकरणले तोकेको ‘फिट एन्ड प्रोपर टेस्ट’ को मापदण्ड भने अनिवार्य रूपमा पूरा गरेको हुनुपर्नेछ।

मापदण्ड पुगेका इच्छुक संस्थापकहरूले तोकिएको ३५ दिनभित्र काठमाडौंको कमलादीस्थित कम्पनीको केन्द्रीय कार्यालयमा आवश्यक कागजातसहित निवेदन बुझाउनुपर्नेछ। यदि तोकिएको म्यादभित्र विद्यमान संस्थापकहरूबाट कुनै पनि आवेदन नपरेको खण्डमा भने उक्त सेयर सर्वसाधारण वा अन्य कुनै संस्थालाई बेच्ने प्रक्रिया अघि बढाइने कम्पनीले प्रस्ट पारेको छ।