काठमाडौं — शेयर बजार परिसूचक (नेप्से) यतिबेला एउटा निकै महत्त्वपूर्ण प्राविधिक मोड (Crucial Juncture) मा आइपुगेको छ। बुधबार सामान्य अंकले घटेर २,५७२.३४ विन्दुमा बन्द भएको बजारले लगानीकर्तामा ‘अब बजार कता जाला ?’ भन्ने गम्भीर चासो उब्जाएको छ। पछिल्लो समय ‘लोअर हाइ’ र ‘लोअर लो’ को शृङ्खला बनाउँदै ओरालो लागिरहेको बजारले अब लिने दिशा प्राविधिक विन्दुहरूले स्पष्ट पार्ने विश्लेषण हुन थालेको छ।

बुधबारको दैनिक चार्टमा देखिएको ‘डोजी’ वा ‘स्पिनिङ टप’ प्रकृतिको क्यान्डलले बजारमा तीव्र अनिर्णयको स्थिति देखाएको छ। यसको अर्थ क्रेता र विक्रेता दुवै पक्ष ‘पर्ख र हेर’ को अवस्थामा छन्। बजार एउटा बलियो सपोर्ट (टेवा) विन्दुको नजिक पुगेकाले पनि विक्रेताहरू थप शेयर फाल्न हच्किएका छन् भने क्रेताहरू पनि बजार माथि फर्किने बलियो संकेतको पर्खाइमा छन्। जसले गर्दा बजारले अबको बाटो तय गर्न एउटा स्पष्ट ‘ब्रेकआउट’ वा ‘ब्रेकडाउन’ को बाटो कुर्नुपर्ने प्राविधिक विश्लेषणले देखाउँछ।

चार्ट अनुसार यतिबेला बजारको सबैभन्दा बलियो र पहिलो सपोर्ट विन्दु२,५४६.६९ को आसपासमा रहेको छ। आगामी कारोबार दिनहरूमा बजारले यो विन्दुलाई कत्तिको सम्मान गर्छ भन्ने कुराले नै नेप्सेको आगामी यात्रा तय गर्नेछ। यदि बजारले यो सपोर्टलाई जोगाउन सकेन र तल झर्यो भने परिसूचक २,५०१ को अर्को सपोर्ट विन्दु सम्म ओर्लिन सक्ने जोखिम रहन्छ। तर, यही विन्दुबाट बजारले ‘रिभर्सल’ (उल्टो गति) लिएर माथि लागेमा भने २,६७६ को पहिलो रेजिस्टेन्स (प्रतिरोध) सम्मको यात्रा तय हुने निश्चित छ।

अन्य प्राविधिक इन्डिकेटर (सूचक) हरूले पनि बजारमा उल्टो गति लिन सक्ने सम्भावनालाई नजिक ल्याइरहेका छन्। हाल ४३.०५ को स्तरमा रहेको ‘रिलेटिभ स्ट्रेन्थ इन्डेक्स’ (RSI) ले बजारमा अझै बियरिस (घट्दो) सेन्टिमेन्ट देखाए पनि, यो ‘ओभरसोल्ड’ (अत्यधिक बिक्री भएको) जोन ३० को निकै नजिक पुग्दैछ। यसले बजारमा बिक्री चाप विस्तारै कम हुँदै गएको र जुनसुकै बेला खरिदकर्ता हाबी भएर बजारले ‘रिभर्सल’ लिन सक्ने संकेत गर्छ।

त्यसैगरी, ‘मुभिङ एभरेज कन्भर्जेन्स डाइभर्जेन्स’  सूचकले पनि आशाका किरण देखाएको छ। म्याक्डी लाइन र सिग्नल लाइन दुवै शून्य रेखाभन्दा तल (नेगेटिभ जोनमा) रहे पनि यी दुई रेखाबीचको दूरी क्रमिक रूपमा साँघुरिँदै गएको छ। यसले बजार घट्ने गतिको शक्ति (बियरिस मोमेन्टम) कमजोर हुँदै गएको र ट्रेन्ड परिवर्तनको प्रारम्भिक विन्दुमा बजार उभिएको हुन सक्ने देखाउँछ।

समग्रमा, नेप्से परिसूचक घट्दा पनि बुधबार करिब पौने ४ अर्बको उच्च कारोबार हुनुले तल्लो विन्दुमा शेयर सङ्कलन गर्ने ‘बार्गेन हन्टर’ हरूको सक्रियतालाई पुष्टि गर्छ। यस्तो अवस्थामा प्राविधिक रूपले बजार स्थिरता (कन्सोलिडेसन) को चरणमा रहेकाले लगानीकर्ताहरूले २,५४६ को सपोर्ट र २,६७६ को रेजिस्टेन्सलाई नजिकबाट नियाल्दै संयमित भएर आगामी रणनीति तय गर्नुपर्ने देखिन्छ।