काठमाडौं, १६ कात्तिक। माध्यमिक शिक्षा परीक्षा (एसईई) तथा आधारभूत तह उत्तीर्ण परीक्षा (बीएलई) नजिकिँदै गर्दा नेपाली डिजिटल लर्निङ प्लेटफर्म ‘अभ्यास’ले विद्यार्थीका लागि अनलाइन तयारी कक्षा सञ्चालनमा ल्याएको छ ।

सार्वजनिक विद्यालयका शिक्षकहरूसँगको सहकार्यमा सञ्चालन भइरहेको उक्त कार्यक्रमले विद्यार्थीलाई परीक्षाको प्रभावकारी तयारी गर्न सहयोग पुर्‍याउने लक्ष्य राखेको छ ।

गणित विषयका शिक्षक किरण धिताल र अविनाश कार्कीले विद्यार्थीलाई विषयवस्तुको अवधारणा स्पष्ट बुझ्न र नियमित अभ्यासमा जोड दिन सुझाव दिएका छन् । उनीहरूका अनुसार परीक्षामा राम्रो नतिजा हासिल गर्न घोक्नेभन्दा विषयवस्तु बुझेर निरन्तर अभ्यास गर्नु महत्त्वपूर्ण हुन्छ ।

‘अभ्यास’ प्लेटफर्ममा विद्यालयको पाठ्यक्रममा आधारित भिडियो पाठ, क्विज तथा अन्तरक्रियात्मक सिकाइ सामग्री उपलब्ध छन् । यसमार्फत गणित, विज्ञान, अंग्रेजी, नेपाली, सामाजिक अध्ययन तथा कम्प्युटर विषयको अध्ययन गर्न सकिनेछ ।

विद्यार्थीले मोबाइल फोनमार्फत पनि प्लेटफर्ममा उपलब्ध शैक्षिक सामग्री प्रयोग गर्न सक्नेछन् । आफ्नो अनुकूल समयमा र आफ्नै गतिमा अध्ययन गर्न मिल्ने भएकाले यसले विद्यार्थीलाई घरमै बसेर परीक्षाको तयारी गर्न सहज बनाउने अपेक्षा गरिएको छ ।

अनलाइन कक्षा तथा अध्ययन सामग्रीबारे थप जानकारीका लागि विद्यार्थीले अभ्यासको वेबसाइट abhyasedu.com.np मा जान सक्नेछन् ।