काठमाडौं, १८ कात्तिक। युवा, श्रम तथा रोजगार मन्त्रालयअन्तर्गतको राष्ट्रिय व्यावसायिक प्रशिक्षण प्रतिष्ठानले सञ्चालन गर्न लागेको निःशुल्क अनलाइन आर्टिफिसियल इन्टेलिजेन्स (एआई) तालिममा ६८ हजार ५०० भन्दा बढी युवाले आवेदन दिएका छन् ।

प्रतिष्ठानले सञ्चालन गर्न लागेको ‘प्रभावकारी प्रम्प्ट इन्जिनियरिङसहित एआईमा दक्षता हासिल गर्ने’ (Mastering AI with Effective Prompt Engineering) नामक तालिमका लागि ठूलो संख्यामा आवेदन परेको हो ।

तालिमका लागि आवेदन दिने अन्तिम समय मंगलबार दिउँसो ३ बजे समाप्त भएको थियो । कार्यक्रमअन्तर्गत आवेदन दिएका मध्येबाट एक हजार जना प्रशिक्षार्थी छनोट गरिने प्रतिष्ठानले जनाएको छ ।

छनोट भएका आवेदकलाई एसएमएसमार्फत जानकारी गराइनेछ । तालिम सञ्चालनसम्बन्धी थप विवरण तथा आवश्यक जानकारी आधिकारिक माध्यमबाट सार्वजनिक गरिने बताइएको छ ।

निःशुल्क अनलाइन माध्यमबाट सञ्चालन हुने यस तालिमले युवालाई एआई प्रविधिको प्रभावकारी प्रयोग, प्रम्प्ट इन्जिनियरिङ तथा डिजिटल सीप विकासमा सहयोग पुग्ने अपेक्षा गरिएको छ ।

एआई प्रविधिको प्रयोग तीव्र रूपमा विस्तार भइरहेका बेला यससम्बन्धी सीप हासिल गर्न युवाहरूको उल्लेख्य आकर्षण देखिएको यस आवेदन संख्याले संकेत गरेको छ ।