Dhulikhel Eco Banner new

प्रधानमन्त्री बालेन्द्र साह आइतबार दुईदिने भारत भ्रमणमा जाने

1.2K
shares

काठमाडौं, ४ मंसिर । प्रधानमन्त्री बालेन्द्र साह भारतीय प्रधानमन्त्री नरेन्द्र मोदीको निमन्त्रणामा आगामी मंसिर ६ र ७ गते भारतको दुईदिने राजकीय भ्रमणमा जाने भएका छन्। परराष्ट्र मन्त्रालयका सचिव अमृतबहादुर राईले शुक्रबार सिंहदरबारमा आयोजित पत्रकार सम्मेलनमार्फत भ्रमणको कार्यक्रम सार्वजनिक गरेका हुन्।

सचिव राईका अनुसार प्रधानमन्त्री साह मंसिर ६ गते आइतबार दिउँसो १ बजेर ४५ मिनेटमा नेपाल वायुसेवा निगमको नियमित उडानमार्फत भारत प्रस्थान गर्ने कार्यक्रम छ।

भ्रमणमा अर्थमन्त्री डा. स्वर्णिम वाग्ले, परराष्ट्रमन्त्री शिशिर खनाल, प्रधानमन्त्रीका मुख्य सल्लाहकार, राजनीतिक सल्लाहकार तथा उच्चपदस्थ सरकारी अधिकारी सहभागी हुनेछन्। परराष्ट्र मन्त्रालयका अनुसार सरकारी भ्रमण टोली ३४ सदस्यीय हुनेछ। यसैगरी, निजी क्षेत्रका ५२ जना व्यवसायी आफ्नै खर्चमा भ्रमणमा सहभागी हुनेछन्। विभिन्न सञ्चारमाध्यमका पत्रकार पनि निजी खर्चमा भ्रमणमा जाने कार्यक्रम रहेको छ। नयाँ दिल्लीस्थित नेपाली दूतावासका राजदूतसहित केही प्रतिनिधि पनि भ्रमणमा सहभागी हुनेछन्।

भ्रमणको दोस्रो दिन मंसिर ७ गते प्रधानमन्त्री साह र भारतीय प्रधानमन्त्री नरेन्द्र मोदीबीच प्रतिनिधिमण्डलस्तरीय वार्ता हुने कार्यक्रम छ। उक्त वार्तामा नेपाल–भारतबीचको व्यापार, पारवहन, लगानी, ऊर्जा, पूर्वाधार तथा सम्पर्क सञ्जाल विस्तारलगायतका विषयमा छलफल हुने परराष्ट्र मन्त्रालयले जनाएको छ।

सचिव राईका अनुसार भ्रमणका क्रममा नेपाल र भारतबीच सम्पर्क सञ्जाल विस्तार तथा ऊर्जा सहकार्यासँग सम्बन्धित विभिन्न परियोजनाको उद्घाटन र नयाँ परियोजनाको शिलान्यास गर्ने कार्यक्रमसमेत तय गरिएको छ।

त्यसैगरी, शिक्षा, स्वास्थ्य, कृषि, खेलकुद, विपद् व्यवस्थापन तथा मानव संसाधनलगायतका क्षेत्रमा सहकार्य विस्तार गर्ने उद्देश्यले विभिन्न समझदारीपत्र आदानप्रदान गर्ने कार्यक्रम रहेको मन्त्रालयले जनाएको छ।

परराष्ट्र मन्त्रालयका अनुसार नेपाल र भारतबीच व्यापार, पारवहन, लगानी, ऊर्जा तथा पूर्वाधारका क्षेत्रमा सहकार्यका विषय भ्रमणका प्रमुख कार्यसूचीमा समावेश छन्।

प्रधानमन्त्रीको भारत भ्रमणका क्रममा हुने द्विपक्षीय वार्ता, परियोजना उद्घाटन तथा समझदारीपत्र आदानप्रदानसम्बन्धी कार्यक्रमलाई भ्रमणको औपचारिक कार्यसूचीमा समावेश गरिएको छ।