काठमाडौं, २७ कात्तिक । शिक्षाको क्षेत्रमा नयाँ सोच र अभ्यासका साथ कार्यरत संस्था एम्बार्क अनम्याथले नेपालमा पहिलोपटक गणितीय सोच र बहसलाई संयोजन गर्ने कार्यक्रम ‘ग्लोबल म्याथ डिबेट लिग सुरु गरेको छ । यो लिगको मुख्य उद्देश्य गणितलाई केवल अङ्क र सूत्रको सीमामा नबाँधी, विचार, तर्क र संवादको माध्यमका रूपमा स्थापित गर्नु हो ।

‘ग्लोबल म्याथ डिबेट लिग’ले विद्यार्थीहरूलाई गणितलाई समस्या समाधानको मात्र उपकरण नभई, आफ्ना विचार अभिव्यक्त गर्ने र सिर्जनशीलता प्रदर्शन गर्ने माध्यमका रूपमा प्रयोग गर्न प्रोत्साहित गर्छ। एम्बार्क अनम्याथका सह संस्थापक दिवेश बठिजाका अनुसार, “गणित भनेको केवल हिसाब किताब होइन, यो त तार्किक सोच र समस्या समाधानको रोमाञ्चक यात्रा हो। यो लिगले विद्यार्थीहरूलाई परम्परागत कक्षाकोठाभन्दा बाहिरको सोच र अनुभव दिने राष्ट्रिय मञ्च बन्नेछ,” उनले बताए ।

यस वर्ष ‘ग्लोबल म्याथ डिबेट लिग’मा देशभरका विद्यालयका करिब ५ हजारभन्दा बढी विद्यार्थीहरू सहभागी हुने अपेक्षा गरिएको छ । प्रतियोगिता तीन चरणमा सञ्चालन हुनेछ स्क्रिनिङ राउन्ड, क्षेत्रीय छनोट र राष्ट्रिय फाइनल राउन्ड । यो प्रतियोगिताले विद्यार्थीहरूलाई सहकार्य, रचनात्मकता र आलोचनात्मक सोचमा जोड दिन्छ । सहभागीहरूले यस प्रक्रियाबाट आफ्नो विश्लेषणात्मक क्षमता, आत्मविश्वास र गणितको व्यावहारिक उपयोगबारे गहिरो बुझाइ हासिल गर्ने अवसर पाउनेछन् ।

गणित र संवादको कलालाई जोडेर, ‘ग्लोबल म्याथ डिबेट लिग’ले नयाँ पुस्तालाई विश्लेषणात्मक रूपमा सोच्न र प्रभावकारी रूपमा अभिव्यक्त हुन सक्षम नेतृत्वकर्ताका रूपमा सशक्त बनाउने लक्ष्य राखेको छ। यसले गणितलाई रचनात्मकता, नवप्रवर्तन र नेतृत्वको माध्यमका रूपमा प्रस्तुत गर्दै युवा बहसकर्ता, समस्या समाधानकर्ता र सोचविचार गर्नेहरूको राष्ट्रिय समुदाय निर्माण गर्ने उद्देश्य लिएको छ।

सन् २०१२ मा स्थापना भएको अनम्याथ स्कुलले विद्यालयस्तरमा गणित सिकाउने परम्परागत पद्धतिलाई परिवर्तन गर्दै आएको छ। यसको विस्तारित रूप एम्बार्क अनम्याथले ‘ग्लोबल म्याथ डिबेट लिग’, ‘म्याथ म्याराथन’ र ‘स्पेस म्याथ’ जस्ता कार्यक्रमहरू मार्फत गणितलाई रमाइलो, अर्थपूर्ण र प्रेरणादायी विषयका रूपमा प्रस्तुत गर्दै आएको छ।