काठमाडौं । नेपाल धितोपत्र बोर्ड (सेबोन) को अध्यक्ष पदका लागि आवेदन खुला भएसँगै पूँजीबजारमा नयाँ हलचल देखिएको छ। यसैबीच सेयर बजार विश्लेषकका रूपमा चिनिएका ‘शिव चन्द्र’ले पनि अध्यक्ष पदका लागि आवेदन दिने तयारी गरेका छन्। सामाजिक सञ्जालमार्फत सक्रिय उनी लगानीकर्तामाझ परिचित नाम बनेका छन्।

‘शिव चन्द्र’ नामबाट फेसबुकमा नियमित बजार विश्लेषण प्रस्तुत गर्दै आएका उनको वास्तविक नाम पुरुषोत्तम राज चिमोरिया हो। पछिल्लो समय नेपाली सेयर बजारमा नयाँ लगानीकर्ताको संख्या उल्लेख्य रूपमा बढ्दै जाँदा उनका विश्लेषण र सुझावहरू धेरैका लागि मार्गदर्शक बनेको प्रतिक्रिया सामाजिक सञ्जालमा देखिन्छ। विशेषगरी साना तथा नयाँ लगानीकर्ताले उनको सामग्रीलाई सहज र उपयोगी मान्दै आएका छन्।

व्यावसायिक अनुभवका हिसाबले पनि उनी पूँजीबजारसँग नजिकबाट जोडिएका व्यक्ति हुन्। उनले एशियन क्यापिटल लिमिटेडमा करिब सात वर्षसम्म प्रमुख लगानी अधिकृतका रूपमा काम गरेका छन्। यस अनुभवले उनलाई बजार संरचना, जोखिम व्यवस्थापन र लगानी रणनीतिबारे व्यवहारिक ज्ञान दिएको मानिन्छ।

यसअघि वैशाख ४ गते सेबोनका अध्यक्ष सन्तोष श्रेष्ठले पदबाट राजीनामा दिएपछि उक्त पद रिक्त रहेको छ। सोही सन्दर्भमा सरकारले नयाँ अध्यक्ष नियुक्तिका लागि आवेदन खुला गरेको हो। अर्थ मन्त्रालयअन्तर्गतको सचिवालयमार्फत प्रकाशित सूचनाअनुसार इच्छुक उम्मेदवारले सात दिनभित्र आवेदन दिन सक्नेछन्।

अध्यक्ष पदका लागि न्यूनतम योग्यता पनि तोकिएको छ। उम्मेदवारले स्नातकोत्तर उपाधि हासिल गरेको हुनुपर्नेछ भने पूँजी बजार, वित्त वा व्यवस्थापन क्षेत्रमा कम्तीमा सात वर्षको अनुभव अनिवार्य गरिएको छ। यस प्रावधानले योग्य र अनुभवी व्यक्तिलाई नेतृत्वमा ल्याउने उद्देश्य राखिएको जनाइएको छ।

नयाँ अध्यक्षको चयनसँगै धितोपत्र बजारमा सुधारको अपेक्षा गरिएको छ। पछिल्लो समय बजारमा देखिएको अस्थिरता, नीतिगत अस्पष्टता र लगानीकर्ताको घट्दो मनोबललाई सम्बोधन गर्न सक्षम नेतृत्व आवश्यक रहेको सरोकारवालाहरूको धारणा छ। यस्तो अवस्थामा सामाजिक सञ्जालमार्फत सक्रिय विश्लेषकदेखि संस्थागत अनुभव भएका व्यक्तिसम्मको प्रतिस्पर्धाले यसपटकको नियुक्ति प्रक्रिया थप चासोको विषय बनेको छ।