नेपाल बीमा प्राधिकरणको नेतृत्व तहमा को पुग्ला भन्ने चासोबीच अध्यक्ष पदका लागि आवेदन संकलनको काम टुङ्गिएको छ । अन्तिम दिन ढोका बन्द हुँदासम्म जम्मा ५० जना उम्मेदवार मैदानमा उत्रिसकेका छन् ।

दाबेदारहरूको पृष्ठभूमि हेर्दा क्षेत्रको विविधता झल्किन्छ । बीमा विज्ञदेखि प्राधिकरणकै भित्रका कर्मचारी, नेपाल राष्ट्र बैंकका सेवारत र अवकाशप्राप्त अधिकारी तथा बीमा कम्पनीका पूर्व प्रमुख कार्यकारी अधिकृतसमेत आवेदकको पंक्तिमा छन् । सिफारिस समितिले जेठ १३ गते सूचना निकालेर यो प्रक्रिया खुला गरेको थियो ।

यसपटकको छनोट विधि अघिल्लोभन्दा सरल बनाइएको छ । पहिले उम्मेदवारले कार्ययोजना बुझाउनुपर्ने र छनोटमा परेकाहरूले त्यसको प्रस्तुतीकरण गर्नुपर्ने झन्झट थियो, अहिले भने व्यक्तिगत विवरण र स्वघोषणा फारम मात्र पुग्छ । धितोपत्र बजार नियामकको अध्यक्ष छनोटमा पनि यही ढाँचा अपनाइएको थियो, तर त्यो पद भने अझैसम्म रित्तै छ ।

तत्कालीन अध्यक्ष शरद ओझालाई सरकारले हटाएपछि प्राधिकरणमा नयाँ अनुहार खोज्ने यो अभियान सुरु भएको हो ।