काठमाडौं, ११ फागुन । नेपाल बैंकको ६५औँ वार्षिक साधारणसभा आउदो चैत ६ गते बुधबार बस्ने भएको छ । बैंकले बिहीवार बसेको सञ्चालक समितिको बैठकले बैंकको ६५औं वार्षिक साधारणसभा आउदो चैत ६ गते बुधबार काठमाडौंको हलचोकस्थित नेपाल एपीएफ क्लबमा बिहान साढे १० बजे बस्ने निर्णय गरेको हो।

सभाले बैंकको नियमावलीमा भएको व्यवस्था बमोजिम सर्वसाधारण शेयरधनी तर्फबाट प्रतिनिधित्व गर्ने ३ जना सञ्चालकको निर्वाचन गर्ने प्रस्ताव पनि सभाका लागि तय गरिएको छ।

गत आर्थिक वर्षको वार्षिक र लेखापरीक्षण प्रतिवेदन लगायतका वित्तीय विवरणहरू पारित गर्नुका साथै चालू आवको लागि लेखापरीक्षक नियुक्त गरी निजको पारिश्रमिक निर्धारण गर्नेछ।

साधारणसभा प्रयोजनार्थ बैंकले यही फागुन २२ गते बुक क्लोज गर्ने निर्णय गरेको छ। बुक क्लोजको आधारमा फागुन २१ गतेसम्म कायम शेयरधनीहरू मात्र सभामा भाग लिन सक्नेछन्।