काठमाडौं, ६ भदौ । अधिकारकर्मी दुर्गाकुमार थापाले परराष्ट्रमन्त्री डा. नारायण खड्का सहभागी कार्यक्रममा स–साना बालबालिकाहरुको प्रयोग गरिनु दुखद् र लज्जापद भएको बताएका छन् । बालअधिकारका लागि उदयपुर लामो समय काम गरेका थापाले बहालवाला मन्त्रीकै कार्यक्रममा बालबालिकालाई सास्ती दिनु गलत भएको बताएका हुन् ।

वेलका नगरपालिकाका पूर्व मेयर समेत रहेका थापाले बालबालिका शान्ति क्षेत्र हुन् भनेर सरकारले नै घोषणा गरेको कुरा कम्तिमा सरकारमा बस्नेले हेक्का राख्नु पर्ने बताए । बालबालिकाको सकारात्मक सहभागितामा सबैले जोड दिनु पर्ने बताएका थापाले नकरात्मक सहभागिता भने सबैले निरुत्साहित गर्नुपर्ने बताए ।

उदयपुरको एक पुल उद्घाटन कार्यक्रममा नेपाली कांग्रेस र माओवादीका नेताहरुले बालबालिका लगेका थिए । कार्यक्रम स्थलमा मन्त्री खड्का निर्धारित समयभन्दा निकै ढिला पुग्दा स–साना बालबालिकाहरु लामो समय टन्टलापुर घाममा उभिन बाध्य भए । कार्यक्रममा केही साना बालबालिकाहरुलाई पञ्चकन्याका रुपमा र धेरैलाई भाषण सुन्ने ठाउँमा उभिनकै लागि बोलाइएको थियो ।

‘हामीले बुझ्नै पर्ने कुरा भनेको बालबालिकोको सकारात्मक सहभागिता र नकरात्मक सहभागिता हुन्छ’ थापाले केटिएम भ्वाइससँग भने, ‘बालबालिका सजावटका सामाग्री होइनन्, उनीहरुलाई बाल संगठनमा सहभागी गराउनु राम्रो हो तर राजनीतिक कार्यक्रममा सजाउनका लागि लगिनु गलत हो ।’

Follow Up