काठमाडौं, ४ साउन । रुसले युक्रेनमा ब्यालिस्टिक मिसाइल तथा ड्रोनहरूको शृङ्खलाबद्ध प्रहार गर्दा कम्तीमा आठ जनाको मृत्यु भएको छ भने दर्जनौँ घाइते भएका छन्।

उत्तर-पूर्वी सहर खार्किभमा चार जना, राजधानी किभमा एक वृद्ध महिला, दक्षिणको जापोरिज्जियामा दुई जना र उत्तर-पूर्वी सुमीमा एक जनाको ज्यान गएको छ। युक्रेनी राष्ट्रपति भोलोडिमिर जेलेन्स्कीले किभमा भएको यो आक्रमण सन् २०२२ मा रुसले पूर्ण रूपमा आक्रमण सुरु गरेपछिकै सबैभन्दा भीषण ब्यालिस्टिक प्रहारमध्ये एक भएको बताएका छन्। आइतबार अबेर युक्रेनी नौसेनाका अनुसार कृष्ण सागरमा अन्न बोकेको टर्कीको स्वामित्वमा रहेको एक नागरिक कार्गो जहाजमा रुसी मिसाइल लाग्दा पाँच जनाको मृत्यु भएको छ। यस विषयमा रुसले भने कुनै टिप्पणी गरेको छैन।

यसैबिच युक्रेनले पनि ब्ल्याक सीमा रहेका रुसी तेल ट्याङ्कर र दक्षिणी स्टाभ्रोपोल क्षेत्रका तीन वटा तेल डिपोमा प्रहार गरेको जनाएको छ। जेलेन्स्कीले ती डिपोहरू रुसी आक्रमणको स्रोत भएकाले निशाना बनाइएको बताएका छन्।

रातभर किभ क्षेत्रका विभिन्न स्थानमा प्रहार भएको थियो। युक्रेनी सेनाले राजधानीको हवाई प्रतिरक्षा प्रणालीले ४१ मध्ये १८ मिसाइल र १०८ वटा ड्रोन खसालेको दाबी गरेको छ। खार्किभका क्षेत्रीय प्रमुख ओलेह सिन्येहुबोभका अनुसार सहरको उपनगरमा रहेको एक हुलाक टर्मिनलमा आक्रमण हुँदा २४ देखि ६२ वर्ष उमेरका चार पुरुषको मृत्यु भएको छ। घाइतेमध्ये केहीको अवस्था गम्भीर छ।

टेलिग्राम सन्देशमा जेलेन्स्कीले बितेको एक सातामा रुसले युक्रेनविरुद्ध करिब एक हजार चार सय ५० वटा स्ट्राइक ड्रोन, एक हजार छ सय ४० भन्दा बढी गाइडेड बम र ९९ वटा विभिन्न प्रकारका मिसाइल प्रयोग गरेको बताएका छन्।

जेलेन्स्कीले युक्रेनी जवाफी प्रहारबारे पनि जानकारी दिएका छन्। उनले भने, ‘सुरक्षा सेवा ९एसबीएस० का एकाइहरूले स्टाभ्रोपोल क्षेत्रका तीन वटा तेल डिपोमा एकै पटक प्रहार गरे भने हाम्रा सशस्त्र बलहरूले सोही क्षेत्रको अर्को इन्धन क्षेत्रमा प्रहार गरे। कृष्ण सागरमा रुसका तीन वटा ‘स्याडो फ्लिट’ ट्याङ्करमा सटीक प्रहार दर्ज गरिएको छ। यो युद्धको अन्त्य हुनुपर्छ भन्ने अनुभूति रुसभित्र फैलाउन मद्दत गर्ने हाम्रा प्रत्येक एकाइलाई म धन्यवाद दिन्छु।’

काजाकिस्तानको क्यास्पियन तेललाई रुसको कृष्ण सागर बन्दरगाह नोभोरोसिक्ससम्म पुर्‍याउने क्यास्पियन पाइपलाइन कन्सोर्टियमले आफ्नो टर्मिनलमा प्रहार भएको जनाएको छ। आक्रमणबाट दुई वटा ट्याङ्करमा क्षति पुगेपछि तेल लोड गर्ने कार्य स्थगित गरिएको छ। यद्यपि कुनै मानवीय क्षति र तेल पोखिने घटना भने भएको छैन। स्टाभ्रोपोलका गभर्नरले ड्रोन आक्रमणका कारण एक औद्योगिक पार्कमा आगलागी भएको बताएका छन्।

युक्रेनी वायुसेनाका अनुसार किभमा भएका पछिल्ला प्रहारहरूमा इस्कन्डर र हाइपरसोनिक जिरकोन मिसाइलका साथै १२५ वटा ड्रोनसहितका रुसी हतियार प्रयोग भएका थिए। किभका मेयर भिटाली क्लिट्चकोले आवासीय र गैर(आवासीय भवनहरूका साथै एक सुपरमार्केट र छात्रावासमा क्षति पुगेको बताएका छन्।

यो आक्रमण हुनुअघि युक्रेनले रुसको सबैभन्दा ठुलो अनलाइन खुद्रा विक्रेता ‘वाइल्डबेडिज’ का दुई वटा गोदाम नष्ट गर्न ड्रोन पठाएको थियो, जसमा आठ जनाको मृत्यु हुनुका साथै ठुलो आगलागी भएको थियो। मस्कोबाट करिब चार सय ७५ किलोमिटर दक्षिण(पूर्वमा रहेको तामबोभ सहरको एक केन्द्रमा सात जनाको मृत्यु र २५ जना घाइते भएका थिए भने राजधानी नजिकैको इलेक्ट्रोलस्टालस्थित अर्को गोदाममा एक जनाको मृत्यु र ३७ जना घाइते भएका थिए।

जेलेन्स्कीले युक्रेनका यी कारबाहीहरू रुसले आफ्ना नागरिक पूर्वाधार, सहर र समुदायहरूमा गरेका आक्रमणको जवाफ भएको बताएका छन्। वाइल्डबेडिजलाई प्रायः अमेजनको रुसी रूप मानिन्छ।

युक्रेनले पछिल्लो समय रुसको महत्त्वपूर्ण ऊर्जा पूर्वाधारमा आफ्ना टाढासम्म प्रहार गर्ने ड्रोन आक्रमणलाई तीव्र बनाएको छ, जसका कारण रुसमा व्यापक इन्धन अभाव भएको छ। यसै महिनाको सुरुमा किभले रुसको तेल प्रशोधन क्षमताको करिब ४३ प्रतिशत भाग निष्क्रिय पारिदिएको दाबी गरेको थियो।