सुपर लघुवित्त समस्याग्रस्त घोषणा
वि.सं.२०७९ भदौ २२ बुधवार ०९:५२
4.3K
shares
shares
काठमाडौं, २२ भदौ । दाङमा केन्द्रीय कार्यालय रहेको सुपर लघुवित्त वित्तीय संस्था लिमिटेड समस्याग्रस्त घोषणा भएको छ । नेपाल राष्ट्र बैैंले २०७८ सालको असोज मसान्तसम्मको वित्तीय विवरण अनुसार यो संस्थालाई समास्या ग्रस्त घोषणा गरेको हो ।
केन्द्रीय बैंकले गरेको स्थलगत निरीक्षण तथा विशेष निरीक्षणबाट यो संस्थाका अध्यक्ष लगायत सदस्यहरुले नक्कली ऋणी खडा गरेर ऋण प्रवाह गरेको पाइएको छ । संस्थाका सदस्यहरुले कर्जा प्रवाह गरी संस्थाको अहित गरेको देखिएको केन्द्रीय बैंकले जारी गरेको सूचनामा भनिएको छ ।
संस्थाको पुँजी कोष अनुपात १०.३१ प्रतिशतले ऋणात्मक रहेकाले सुपर लघुवित्तलाई २०७८/१२/०२ मा बैंक तथा वित्तीय संस्थाको शीघ्र सुधारात्मक कारवाही सम्बन्धी विनियमावली, २०७४ को विनियम ३ को खण्ड (क), (ख) र (ग) बमोजिमको कारवाही गरी उक्त संस्थालाई नेपाल राष्ट्र बैंक ऐन, २०५८ को दफा ८६ ख बमोजिम समस्याग्रस्त घोषणा गर्नु नपर्ने कुनै कारण भए स्पष्टीकरण पेश गर्न निर्देशन दिइएकोमा संस्थाले पेश गरेको स्पष्टीकरण सन्तोषजनक नदेखिएको तथा नेपाल राष्ट्र बैंक ऐन, २०५८ को दफा ८६ ख को (क), (ख), (घ), (च) तथा (ज) को अवस्था विद्यमान रहेको देखिएकोले उक्त संस्थालाई नेपाल राष्ट्र बैंक ऐन, २०५८ को दफा ८६ ख बमोजिम समस्याग्रस्त वित्तीय संस्थाको रुपमा घोषणा गरिएको राष्ट्र बैंकको सुपरिवेक्षण विभागले जारी गरेको सूचनामा उल्लेख गरिएको छ ।
यो संस्थामा आर्थिक हिनामिना भएको भन्दै अध्यक्ष सहितका व्यक्तिहरुलाई प्रहरीले खोजिरहेको जनाएको छ । लघुवित्तका केही कर्मचारीलाई भने प्रहरीले पक्राउ गरेको थियो । कायम मुकायम सीईओ सहितका कर्मचारीलाई पक्राउ गरेको भए पनि कामु सीईओ भने धरौटीमा छुटेका थिए ।
Follow Up
