स्वस्तिक लघुवित्त वित्तीय संस्थाले आफ्ना सेयरधनीहरूलाई २०० प्रतिशत (१:२ अनुपातमा) हकप्रद सेयर दिने तयारी गरेको छ। यसै विशेष प्रस्तावसहित अन्य महत्त्वपूर्ण एजेन्डाहरू पारित गर्न संस्थाले आगामी भदौ २७ गते वार्षिक साधारणसभा डाकेको हो।

हालको चुक्ता पुँजीको आधारमा एक कित्ता सेयर हुनेले थप दुई कित्ता खरिद गर्न पाउने गरी यो प्रस्ताव अघि सारिएको हो। नेपाल राष्ट्र बैंक र धितोपत्र बोर्डबाट अन्तिम स्वीकृति पाएपछि मात्रै यो हकप्रद बजारमा आउनेछ। यद्यपि, आर्थिक वर्ष २०८१/८२ को मुनाफाबाट भने कम्पनीले सेयरधनीलाई कुनै पनि लाभांश वितरण नगर्ने भएको छ।

साधारणसभामा सहभागी हुन चाहने सेयरधनीले भदौ १० गतेभित्र आफ्नो नाममा सेयर कायम गरिसक्नुपर्नेछ। कम्पनीले सभा प्रयोजनका लागि भदौ ११ गते एक दिन बुक क्लोज गर्दैछ। सभाले गत आर्थिक वर्षको वासलात, नाफा–नोक्सान र नगद प्रवाहलगायतका सम्पूर्ण वित्तीय प्रतिवेदनहरूमाथि छलफल गरी अनुमोदन गर्ने कार्यक्रम छ।